شہریوں کا تحفظ ہماری سب سے بڑی ذمہ داری ہے: وزیر اعلیٰ 

دہرادون۔ چیف منسٹر پشکر سنگھ دھامی نے سنیل آئی ٹی بی پی کیمپ میں فوج، آئی ٹی بی پی، این ڈی آر ایف اور لینڈ سلائیڈ کی تحقیقات میں مصروف مختلف اداروں کے سائنسدانوں، ضلع انتظامیہ، پولیس اور ضروری خدمات سے وابستہ ضلعی سطح کے افسران کی میٹنگ کی۔ وزیراعلیٰ نے کہا کہ شہریوں کا تحفظ ہماری سب سے بڑی ذمہ داری ہے۔ انہوں نے ہدایت کی کہ عوام کی حفاظت کے لیے تمام انتظامات کو یقینی بنایا جائے۔
وزیر اعلیٰ نے لینڈ سلائیڈنگ کی تحقیقات میں مصروف مختلف اداروں کے سائنسدانوں سے بھی بات چیت کی اور جوشی مٹھ میں لینڈ سلائیڈنگ کی وجوہات پر جاری مطالعہ اور تحقیق کے بارے میں دریافت کیا۔ جس میں سائنسدانوں نے اب تک کی تحقیقات سے آگاہ کیا۔
وزیر اعلیٰ پشکر سنگھ دھامی نے مقامی عوامی نمائندوں اور ممتاز شہریوں کے ساتھ میٹنگ کی۔ انہوں نے ہر کسی سے کہا کہ وہ آفات کے وقت انتظامیہ کے ساتھ مل کر کام کریں۔ انہوں نے کہا کہ متاثرین کی جان و مال کی حفاظت کرتے ہوئے ان کے لیے آگے کی راہ ہموار کرنا ہماری ترجیح ہے۔ وزیر اعلیٰ نے کہا کہ جن لوگوں کے گھر، دکانیں، کاروبار متاثر ہوئے ہیں ان کو فوری طور پر 1.50 لاکھ روپے عبوری امداد کے طور پر دیے جا رہے ہیں۔ حکومت متاثرہ افراد کی بحالی کے لیے ہر ممکن مدد فراہم کرے گی۔ کچھ لوگ جوشی مٹھ کو لے کر غلط ماحول بنا رہے ہیں۔ جس کی وجہ سے ہمارے عوام مشکلات کا شکار ہیں اور ان کی معیشت متاثر ہو رہی ہے۔